4743 Also a swete helle it is,
4744 And a soroufull paradys;
4745 A plesaunt gayl and esy prisoun,
4746 And, full of froste, somer sesoun;
4747 Pryme temps, full of frostes white,
4748 And May, devoide of al delite,
4749 With seer braunches, blossoms ungrene;
4750 And newe fruyt, fillid with wynter tene.
4751 It is a slowe, may not forbere
4752 Ragges, ribaned with gold, to were;
4753 ffor also well wole love be sette
4754 Under ragges as riche rochette;
4755 And eke as wel by Amourettes
4756 In mournyng blak, as bright burnettes.
4757 ffor noon is of so mochel pris,
4758 Ne no man founden so wys,
4759 Ne noon so high is of parage,
4760 Ne no man founde of witt so sage,
4761 No man so hardy ne so wight,
4762 Ne no man of so mychel myght,
4763 Noon so fulfilled of bounte,
4764 That he with love may daunted be.
4765 Al the world holdith this way;
4766 Love makith alle to goon myswey,