4315 But I, allas, now morne shall;
4316 Bi cause I was withoute the wall,
4317 ffull moche doole and moone I made.
4318 Who hadde wist what woo I hadde,
4319 I trowe he wolde have had pite.
4320 Love to deere hadde soolde to me
4321 The good that of his love hadde I.
4322 I wente aboute it all queyntly;
4323 But now, thurgh doublyng of my peyne,
4324 I see he wolde it selle Ageyne,
4325 And me a newe bargeyn leere,
4326 The which all oute the more is deere,
4327 ffor the solace that I have lorn,
4328 Thanne I hadde it never Aforn.
4329 Certayn I am ful like, in deede,
4330 To hym that caste in erthe his seede;
4331 And hath ioie of the newe spryng,
4332 Whanne it greneth in the gynnyg,
4333 And is also faire and fresh of flour,
4334 Lusty to seen, swoote of odour;
4335 But er he it in sheves shere,
4336 May falle a weder that shal it dere,
4337 And make it to fade and falle,
4338 The stalke, the greyne, and floures Alle;