3499 And while I was in this torment,
3500 Were come of grace, by god sent,
3501 ffraunchise, and with hir pite
3502 ffulfild the bothom of bounte.
3503 They go to daunger anoon right
3504 To forther me with all her myght,
3505 And helpe in worde and in dede,
3506 ffor well they saugh that it was nede.
3507 ffirst, of hir grace, dame ffraunchise
3508 Hath taken of this emprise:
3509 She seide, 'daunger, gret wrong ye do
3510 To worche this man so mych woo,
3511 Or pynen hym so Angerly;
3512 It is to you gret villanye.
3513 I can not see why, ne how,
3514 That he hath trespassed ageyn you,
3515 Save that he loveth; wherfore ye shulde
3516 The more in cherete of hym holde.
3517 The force of love makith hym do this;
3518 Who wolde hym blame he dide Amys?
3519 He leseth more than ye may do;
3520 His peyne is harde, ye may see, lo!
3521 And love in no wise wolde consente
3522 That ye have power to repente;