3475 And daunger toke kepe, if that I
3476 Kepe hym covenaunt trewly.
3477 So sore I dradde his manasyng,
3478 I durst not breke his biddyng;
3479 ffor, lest that I were of hym shent,
3480 I brake not his comaundement,
3481 fforto purchase his good wille.
3482 It was forto come ther tille,
3483 His mercy was to ferre bihynde;
3484 I wepte, for I ne myght it fynde.
3485 I compleyned and sighed sore,
3486 And langwisshed evermore,
3487 ffor I durst not over goo
3488 Unto the rose I loved soo.
3489 Thurgh out my demyng outerly,
3490 That he had knowlege certanly,
3491 Thanne love me ladde in sich a wise,
3492 That in me ther was no feyntise,
3493 ffalsheed, ne no trecherie.
3494 And yit he, full of vylanye,
3495 Of disdeyne, and cruelte,
3496 On me ne wolde have pite,
3497 His cruel will forto refreyne,
3498 Thou I wepe alwey, and me compleyne.