2803 That hope hath hight hym forto wynne.
2804 ffor thought anoon thanne shall bygynne,
2805 As ferre, god wote, as he can fynde,
2806 To make a mirrour of his mynde;
2807 fforto biholde he wole not lette.
2808 Hir psone he shall a fore hym sette,
2809 Hir laughing eyen, psaunt and clere,
2810 Hir shappe, hir fourme, hir goodly chere,
2811 Hir mouth that is so gracious,
2812 So swete, and eke so saverous;
2813 Of all hir fetures he shall take heede,
2814 His eyen with all hir lymes fede.
2815 'Thus swete thenkyng shall Aswage
2816 The peyne of lovers, and her rage.
2817 Thi ioye shall double, withoute gesse,
2818 Whanne thou thenkist on hir semlynesse,
2819 Or of hir laughing, or of hir chere,
2820 That to thee made thi lady dere.
2821 This comfort wole I that thou take;
2822 And if the next thou wolt forsake
2823 Which is not lesse saverous,
2824 Thou shuldist not ben to daungerous.
2825 'The secounde shal be swete speche,
2826 That hath to many oon be leche,