1939 Be meke, where thou must nedis bowe;
1940 To stryve ageyn is nought thi prowe.
1941 Come at oones, and have y doo,
1942 ffor I wole that it be soo.
1943 Thanne yelde thee heere debonairly.'
1944 And I answerid ful hombly,
1945 'Gladly, sir; at youre biddyng,
1946 I wole me yelde in al thyng.
1947 To youre servyse I wole me take;
1948 ffor god defende that I shulde make
1949 Ageyn youre biddyng resistence;
1950 I wole not don so grete offence;
1951 ffor if I dide, it were no skile.
1952 Ye may do with me what ye wile,
1953 Save or spille, and also sloo;
1954 ffro you in no wise may I goo.
1955 My lyf, my deth, is in youre honde,
1956 I may not laste out of youre bonde.
1957 Pleyn at youre lyst I yelde me,
1958 Hopyng in herte, that sumtyme ye
1959 Comfort and ese shull me sende;
1960 Or ellis shortly, this is the eende,
1961 Withouten helthe I mote ay dure,
1962 But if ye take me to youre cure.