1795 Aftir the herte; in wele and woo,
1796 Of force togidre they must goo.
1797 But never this archer wolde feyne
1798 To shete at me with all his peyne,
1799 And forto make me to hym mete.
1800 The thridde arowe he gan to shete,
1801 Whanne best his tyme he myght espie,
1802 The which was named curtesie;
1803 Into myn herte it dide Avale.
1804 A swoone I fell, bothe deed and pale;
1805 Long tyme I lay, and stired nought,
1806 Till I abraide out on my thought.
1807 And faste thanne I avysede me
1808 To drawe out the shafte of tree;
1809 But evere the heed was left bihynde
1810 ffor ought I couthe pulle or wynde.
1811 So sore it stikith whanne I was hit,
1812 That by no craft I might it flit;
1813 But anguyssous and full of thought,
1814 I lefte sich woo, my wounde ay wrought,
1815 That somonede me al way to goo
1816 Toward the rose, that plesede me soo;
1817 But I ne durste in no manere,
1818 Bi cause the archer was so nere.