525 Tho gan I go a full gret pas
526 E[n]vyronyng evene in compas
527 The closing of the square wall,
528 Tyl that I fonde a wiket small
529 So shett, that I ne myght in gon,
530 And other entre was ther noon.
531 Uppon this dore I gan to smyte,
532 That was fetys and so lite;
533 ffor other weye coude I not seke.
534 fful long I shof, and knokkide eke,
535 And stood ful long and of herknyng
536 If that I herde ony wight comyng;
537 Til that dore of thilk entre
538 A mayden curteys openyde me.
539 Hir heer was as yelowe of hewe
540 As ony basyn scoured newe.
541 Hir flesh tendre as is a chike,
542 With bent browis, smothe and slyke;
543 And by mesure large were
544 The openyng of hir yen clere.
545 Hir nose of good proporcioun,
546 Hir yen grey as is a faucoun,
547 With swete breth and wel savoured.
548 Hir face white and wel coloured,