477 With gold and asure over
478 Depeynted newe upon the wall.
479 Square was the wall, and high sumdell;
480 Enclosed, and barred well,
481 In stede of hegge, was that gardyne;
482 Come nevere shepherde therynne.
483 Into that gardyn, wel wrought,
484 Who so that me coude have brought,
485 By laddris, or elles by degre,
486 It wolde wel have liked me.
487 ffor sich solace, sich ioye, and play,
488 I trowe that nevere man ne say,
489 As was in that place delytous.
490 The gardeyn was not daungerous
491 To herberwe briddes many oon.
492 So riche a yeer was never noon
493 Of briddes songe, and braunches grene.
494 Therynne were briddes mo, I wene,
495 Than ben in alle the rewme of ffraunce.
496 fful blissful was the Accordaunce
497 Of swete and pitous songe thei made,
498 ffor all this world it owght glade.
499 And I my silf so mery ferde,
500 Whan I her blisful songes herde,